Их Британи улсад Ковид-19 өвчний тархалт удаан үргэлжилж буйтай холбоoтойгоор энэ удаад шатахуун түгээх станцуудыг тойрсон асуудал үүсчээ.

Өнгөрсөн амралтын өдрүүдээр Британийн хамгийн том газрын тосны компани зарим шатахуун түгээх станцуудаа түр хаах болсноо зарлахад Их Британи даяар бензин авах гэсэн машинууд станцууд дээр урт дараалал үүсгэж хурдны зам руу хүртэл гарч дугаарласан зогссон талаар Британийн BBC суваг мэдээлжээ.

Уг асуудал үүсэх болсон гол шалтгаан нь Ковид-19 өвчний дэгдэлтийн улмаас шатахуун түгээх станцуудын агуулах танкийг дүүргэдэг том оврын ачааны машины жолооч нарын тоо цөөрснөөс үүдэлтэй аж. Европын холбоогоор дамжуулан гадны орнуудаас ажиллах хүч авдаг байсан Их Британи улс тус холбооноос гарсны дараа сүүлийн үед ажиллах хүчний хомсдолд ихээр нэрвэгдээд байгаа юм.

Эцэст нь тус улсын засгийн газрын зүгээс зул сарын баяр хүртэл супермаркет, шатахуун түгээх станцуудад үүссэн логистикийн хямралыг шийдвэрлэхийн тулд ачааны машины жолооч нар болон тахианы махны аж ахуйн салбарт ажилладаг 10,000 орчим хүмүүст түр виз олгох болсноор байдал арай дээрдэж байгаа гэнэ.

Эх сурвалж: MBC