CNBC орон нутгийн цагаар 18-ны өдөр мэдээлснээр, Америкийн өсвөр насныхан энэ жил богино хэмжээний дүрс бичлэг хийж байршуулдаг Хятадын нийгмийн сүлжээний платформ болох TikTok-ыг өөрсдийн Instagram платформоос илүү ашиглаж байгаа талаар онцолжээ.
Зах зээлийн судалгааны Forrester фирмээс мэдэгдэснээр, энэ жил АНУ-ын 12-17 насны өсвөр үеийнхний 63% нь долоо хоног бүр TikTok ашигладаг бол Instagram-ыг 57% нь ашигладаг гэсэн судалгааны дүн гарчээ. Өнгөрсөн жилийн судалгаагаар Instagram-ыг (61%) TikTok-оос (50%) илүү ашигладаг байсан бол энэ жил байдал эсрэгээрээ болсон байна.
Forrester-ийн шинжээч Майк Фрью хэлэхдээ "Z үеийнхэн буюу 1997-2012 оны хооронд төрсөн хүүхдүүд TikTok-ийг бусад платформуудаас илүү хөгжилтэй, эерэг гэж үздэг” нь тогтоогдсон гэжээ.
TikTok сүүлийн үед залуучуудын дунд нэр хүндтэй болж байгаа ч Instagram-ын хувьд хэл аманд орооцолдсон хүндхэн өдрүүд өнгөрч байгаа билээ. Учир нь Инстаграм нь өсвөр насныхан, ялангуяа охидод хортой нөлөө үзүүлдэг гэсэн дотоод судалгааны үр дүн гарсан талаар мэдсээр байж юу ч хийгээгүй хэмээн толгой компани Meta (хуучин Facebook)-г буруутгасан мэдээлэл тарсан явдал нь байдлыг улам хурцатгасан юм.
Энэ бүхнээс үүдэн Meta-ын Гүйцэтгэх захирал Марк Цукерберг 18-29 насны залуучуудын Instagram хэрэглээнд анхаарлаа хандуулан үйлчилгээгээ өөрчлөхөө өнгөрсөн сард мэдэгдсэн билээ.
Мөн Facebook болон Instagram нь богино хэмжээний видео үйлчилгээ болох "Reels"-ээ сайжруулснаар гол толгойны өвчин болоод буй TikTok-той жинхэнэ утгаар өрсөлдөх болно гэжээ. Цукерберг TikTok-ийн талаар "бидний нүүр тулах ёстой хамгийн бодит өрсөлдөгчдийн нэг болсон” гэж үнэлжээ.
Үүний зэрэгцээ, энэхүү судалгаагаар, тус улсын Z үеийнхний хамгийн их ашигладаг нийгмийн сүлжээний платформоор Google-ийн YouTube шалгарсан бөгөөд өсвөр насныхны 72% нь долоо хоног бүр ашигладаг аж.
Эх сурвалж: MBC