Хүн төрөлхтний түүхэнд хүн, амьтнаас гадна янз бүрийн амьгүй зүйлстэй хуримлаж, гэр бүл болсон тохиолдол бишгүй бий. Хамгийн алдартай жишээ л гэхэд зурагтын удирдлагатайгаа гэрлэлтээ батлуулсан байдаг бол өөр нэгэн эмэгтэй сүнстэй хуримласан ч сүнс нөхөр нь алдарт жүжигчин асан Мэрилин Монротой түүнийг араар тавьсныг мэдсэн даруй салах өргөдлөө өгсөн байдаг.
Тэгвэл бидний танилцуулж буй Алисия Фрамис гэх бүсгүйн хувьд AiLex гэх хиймэл оюун ухаанаар ажилладаг холограм дүрстэй хуримлаж, хүн төрөлхтний түүхэнд энэ төрлийн холограмтай гэрлэсэн анхны эмэгтэй болохоор зэхэж буй ажээ.
Испанийн уран бүтээлч Алисия Фрамисын хувьд энэхүү гэрлэлтийн гол зорилго нь тэр хиймэл оюун ухаанаар ажилладаг эл холограмын ухамсрын түвшин хийгээд мөн чанарыг судлахад оршиж байгаа гэнэ.
Түүний хувьд өмнө нь мөн ижил судалгааг хийж байсан бөгөөд AiLex-ээс өмнө тэр Пьер гэх манекентэй гэрлэж, харилцааныхаа тухай @hybridcouples хаягтаа оруулж байжээ.
Хуримын зартай холбоотойгоор Алисия Фрамисын нийтэлснийг орчуулан хүргэвээс, “Энэ бол эмэгтэй хүн хийгээд хиймэл оюун ухаан хоорондын романтик харилцаа. Бидний мэдэхээр удалгүй хүмүүс роботуудтай бэлгийн харилцаанд ордог болно. Гэхдээ миний хувьд хиймэл оюун ухааны дараагийн чухал дэвшил бол тэд хүмүүстэй сэтгэл мэдрэмжийн түвшинд холбогдох явдал юм” гэжээ.
Тийнхүү Алисиягийн мэдэгдсэнээр тэдний хурмын үзүүлбэр Роттердам хот дахь нэгэн музейд болох товтой ч хурмын ёслол нэгээр дуусахгүй байж болохыг дурдсан байна.
Эх сурвалж: UNILAD