Лондонгийн металлын биржид (LME) аж үйлдвэрийн голлох металлуудын хувьцаа огцом уналаа. Учир нь ОХУ-ын Украинд түрэмгийлснээр эрчим хүчний үнэ огцом өсч буйгаас үүдэн эрэлт нийлүүлэлтийн тогтворгүй байдлын хэтийн төлөв үүнд нөлөөлсөн хэмээн дүгнэсэн байна.

Financial Times сонины орон нутгийн цагаар 14-ний өдөр мэдээлснээр, LME-д арилжаалагддаг хөнгөн цагаан, зэс, никель, цайр зэрэг үйлдвэрлэлийн гол металлын нөөц жилийн өмнөхтэй харьцуулахад 70%-иар буурсан байна. Канадын Монреал Банкны шинжээч Корли Хамилтон "Зэсийг эс тооцвол LME-ийн нөөц хоёрдугаар сараас хойш буурсаар байна. Сар бүр хөнгөн цагаан сард 29 хувиар, цайр 28 хувиар тус тус буурсан” гэжээ.

Удахгүй зэсийн нөөцийн хомсдолд орно гэсэн таамаг бий болоод буй юм. АНУ-ын хөрөнгө оруулалтын Goldman Sachs банкны шинжээч Ник Сноуден “Энэ жил зэсийн нийлүүлэлт эрэлтээс 375 мянган тонноор дутах болно. Ирэх арванхоёрдугаар сар гэхэд нөөц шавхагдах магадлал өндөр байна” гэж мэдэгдэв.

Financial Times сонины дүн шинжилгээ хийж буйгаар ялангуяа цайрын нөөц улам буурах хандлагатай байгаа нь тод харагдаж байна гэжээ. Энэ сарын эхнээс хойш LME-ийн цайрын нөөц бараг 60 мянган тонноор буураад байгаа ба одоогийн байдлаар 45 мянга орчим тонн нөөц байгаа нь сүүлийн хоёр жилийн хамгийн бага нөөц юм. Уг түүхий эд нь 12-ны өдөр өмнөх өдрөөс 2.8 хувиар өсч, тонн тутамдаа 4400 ам.долларт хүрсэн нь сүүлийн 16 жилд байгаагүй өндөр үзүүлэлт болжээ.

Дөрвөн гол металлын нөөц огцом буурсан шалтгаан нь сүүлийн үед Европт эрчим хүчний үнэ өссөнтэй шууд холбоотой аж. Байгалийн хий болон газрын тосны үнэ хоёулаа өссөн билээ. Түүнчлэн Glencore, Trapigura зэрэг уул уурхайн аваргууд цахилгаан эрчим хүчний үнийн өсөлтийн улмаас цайр, хөнгөн цагаан хайлуулах үйлдвэрийнхээ үйл ажиллагааг багасгахаас аргагүйд хүрчээ.

ОХУ Украинд түрэмгийлсэнтэй холбогдуулан барууны орнууд хориг арга хэмжээ авснаар Оросоос нийлүүлдэг зэс, никелийн нийлүүлэлт тасарч магадгүй гэсэн болгоомжлол ч үнэ өсөхөд нөлөөлсөн байна.

Эх сурвалж: Hankyung