АНУ-ын эдийн засгийн нөхцөл байдал хийгээд өрийн дарамтад үндэслэн Fitch агентлаг тус улсын зээлжих зэрэглэлийн үнэлгээг бууруулжээ. Улмаар АНУ-ын зээлжих зэрэглэл AAA буюу хамгийн өндөр үнэлгээнээс AA+ үнэлгээ рүү орж буурсан байна.
Үйл явдлын хүрээнд АНУ-ын Сангийн сайд Жанет Йеллен Fitch агентлагийг үндэслэлгүйгээр тэдний зээлжих зэрэглэлийг бууруулсан гэж шүүмжилжээ. Хатагтай Йеллений хэлснээр Fitch агентлаг дээрх шийдвэрийг гаргахдаа 2018-2020 хоорондох тоон баримтыг ашигласан гэсэн бөгөөд түүний дүгнэж байгаагаар эл тоон мэдээлэл нь хуучирсан гэсэн байна. Тийнхүү Сангийн сайдын зүгээс тус агентлагийн шийдвэртэй эрс санал зөржээ.
Зээлжих зэрэглэлийн үнэлгээнд үндэслэн хөрөнгө оруулагчид тус улсын засгийн газарт зээл олгох нь хэр эрсдэлтэйг тогтоодог тул уг зэрэглэл буурах нь сөрөг нөлөө ихтэй юм.
Эх сурвалж: BBC