Пүрэв гарагт БНСУ-ын засгийн газраас коронавирусийн улмаас хохирсон жижиг бизнес эрхлэгч хийгээд хувиараа хөдөлмөр эрхлэгч нарт нийт 20 тэрбум гаруй ам.долларын санхүүгийн тусламж үзүүлэх төлөвлөгөөгөө танилцуулжээ. Тусламж хүртэх зорилтот бүлэгт тус улсын нийт 3.7 сая хувиараа хөдөлмөр эрхлэгч болон жижиг бизнесийн байгууллага багтсан юм.

Энэ долоо хоногт Өмнөд Солонгос улсын ерөнхийлөгч Юн Сук Ёол албан тушаалаа хүлээн авснаас хойш улсын нэмэлт төсвийг 46 тэрбум ам.доллар байхаар төсөвлөсөн бөгөөд үүнээс 18 тэрбум ам.долларыг орон нутгийн захиргаануудад олгох болсон байна.

Сангийн яамнаас мэдэгдсэнээр, энэхүү төсвийг бүрдүүлэхийн тулд тэд ямар нэг бонд гаргахгүй гэсэн юм. Учир нь энэ оны татварын орлогыг 41 тэрбум ам.доллар байхаар тооцсон бөгөөд урьд баталсан байсан 5.4 тэрбум ам.долларын төсвийг өөр зүйлд зарцуулах болсноор бонд гаргах шаардлагагүйгээр улсын нэмэлт төсөв бүрдэж байгаа ажээ.

Тийнхүү нэмэлт төсвөөс 20.4 тэрбум ам.долларыг коронавирусийн улмаас хохирсон хувиараа хөдөлмөр эрхлэгч, жижиг бизнес эрхлэгч нарт тусламж үзүүлэх ажилд зарцуулах бол 4.7 тэрбум ам.долларыг эмнэлгийн салбарынхаа хүчин чадлыг нэмэгдүүлэхэд зарцуулах юм. Харин төсвөөс үлдсэн мөнгийг нийгмийн халамжийн бодлогыг сайжруулахад зориулах болжээ.

Эх сурвалж: Al Jazeera