Дэлхийн Эрүүл Мэндийн Байгууллагаас мэдэгдсэнээр өдгөө 16 оронд илрээд буй сармагчны цэцэг өвчний тархалтыг тогтоон барих бүрэн боломжтой гэжээ.
Одоогийн байдлаар Европын орнууд, АНУ болон Австрали улсад тус вирус бүртгэгдсэн бөгөөд нийт 100 гаруй тохиолдол илрээд байгаа билээ.
Шинжээчдийн үзэж байгаагаар вирусийн тохиолдлын тоо цаашид ч өсөх магадлалтай гэнэ. Гэхдээ хүн амд дагуулж буй эрсдэл нь харьцангуй бага хэмээжээ.
Үйл явдлын хүрээнд ДЭМБ-ын эрчимтэй тархаж буй өвчин судлалын тасгийн ахлах Мариа Ван Керхове даваа гарагт, “Үүссэн нөхцөл байдлыг тогтоон барих бүрэн боломжтой. Бидний зүгээс вирусийг хүнээс хүнд халдварлах явдлыг нь л зогсоох хүсэлтэй байгаа. Үүнийг бид эхлээд дотоодод нь сармагчны цэцэг өвчний вирус илрээгүй орнуудад ажил хэрэг болгох учиртай” гэж мэдэгджээ.
Сармагчны цэцэг өвчний вирусийн хувьд урьд өмнө байсан зүйл бөгөөд Төв болоод Өрнөд Африкийн алслагдмал бүсүүдэд бүртгэгддэг байсан юм. Энэ удаагийн тархалт нь сүүлийн 50 жилийн хугацаанд Африк тивээс гадна бүртгэгдсэн анхны тохиолдол болж байгаа ажээ.
Эрдэмтдийн хэлж байгаагаар сармагчны цэцэг өвчний хүн хооронд тархах чадвар коронавирустэй харьцуулахад маш бага, заавал хүрэлцэх үйлээр дамжуулан халдварладаг гэсэн юм.
Мөн ДЭМБ-ын өөр нэгэн ажилтны хэлснээр сармагчны цэцэг өвчний вирус мутацид орсон ямар ч баримт үгүй хэмээжээ.
Эх сурвалж: BBC