Украинд дайн дэгдэснээс хойш Швейцарь улс анх удаа ОХУ-аас алт импортолсон талаар Bloomberg суваг орон нутгийн цагаар 21-ний өдөр мэдээлэв.
Өнгөрсөн сард ОХУ-аас гурван тонн гаруй алтыг Швейцарь улс руу ачуулсан тухай Швейцарийн Холбооны гаалийн алба мэдээлсэн байна. Ингэснээр өнгөрөгч 2-р сарын сүүлээр Украинд дайн дэгдэснээс хойш анх удаа ОХУ-аас алт импортолж буй нь энэ бөгөөд тухайн сард Швейцарь руу импортолсон нийт алтны 2 орчим хувьтай тэнцсэн аж.
Мэдээллийн агентлагийн дурдаснаар энэ удаагийн алт импортолсон явдал нь Оросын үнэт металлын талаарх салбарын байр суурийг зөөлрүүлэх боломжтойг харууллаа хэмээн нэмж тайлбар хийв.
Лондонгийн алтны зах зээлийн холбооны зүгээс өнгөрөгч 3-р сард ОХУ-аас олборлосон алт болон мөнгийг олон улсын зах зээл дээр арилжаалахыг хориглосны дараа Швейцарь тэргүүтэй дэлхийн хайлуулах үйлдвэрүүд тус улсаас алт худалдан авахгүй байхаар шийджээ.
Дэлхийн алт хайлуулах үйлдвэрлэлийн гуравны хоёр орчим хувийг эзэлдэг 4 том хайлуулах үйлдвэр Швейцарь улсад байрладаг ба эдгээр 4 компани нь салбартаа тэргүүлэгч 7 том компанийн тоонд зүй ёсоор ордог юм.
Украинд халдан түрэмгийлсэнтэй холбогдуулан ОХУ-ын эсрэг авсан хориг арга хэмжээний хүрээнд Швейцарь улс нь Арабын Нэгдсэн Эмират (АНЭУ)-тай алтны худалдаагаа нэмэгдүүлэх зэргээр Оросыг орлох нийлүүлэлтийн гарцыг ихээхэн судалж, төрөлжүүлэх стратеги баримталсан байна.
Өнгөрсөн дөрөвдүгээр сараас хойш Швейцарь улс нь дэлхийн хамгийн том металл олборлогч ОХУ-аас зөвхөн паллади л бага хэмжээгээр импортолж байв.
Эх сурвалж: Asiae