ОХУ-ын ерөнхийлөгч Владимир Путин зэвсэгт бослого өдүүлсэн Вагнер групп болон түүний удирдагч Евгений Пригожин нарт өнгөрсөн нэг жилийн хугацаанд 170 орчим тэрбум рубль зарцуулсан гэдгээ мэдэгдээд зогсохгүй үүнтэй холбогдуулан шалгалт хийнэ гэдгээ өгүүлжээ.
Ройтерс болон ТАСС агентлагийн орон нутгийн цагаар 27-ны өдөр мэдээлснээр, ерөнхийлөгч Путин мөн өдөр Вагнер группын хөлсний цэргүүдийн өдүүлсэн зэвсэгт бослогыг дарах ажиллагаанд оролцсон цэргүүдтэй уулзах үеэрээ “Вагнер группын санхүү бүхэлдээ улсын төсвөөс санхүүжиж байсан гэдгийг та бүхэн мэдэх нь зүйтэй гэж бодож байна. Тодруулж хэлбэл бид улсын төсөв болон Батлан хамгаалах яамаар дамжуулан Вагнер группыг бүрэн санхүүжүүлдэг байсан” хэмээн цохон тэмдэглэв.
Тодруулбал, өнгөрсөн оны тавдугаар сараас хойш буюу сүүлийг нэг жилийн хугацаанд Вагнер группт 86 тэрбум гаруй рублийн санхүүжилт олгосон хэмээн мэдэгдсэн байна.
Үүнээс гадна Пригожин Батлан хамгаалах яамтай хийсэн худалдан авалтын гэрээгээр асар их ашиг хүртсэн хэмээн тэрээр нэмж хэлсэн байна.
"Хэдийгээр Вагнер группын засвар үйлчилгээг төр хариуцаж байсан ч Конкорд Энтерпрайзийн эзэн буюу Пригожин тус группын цэргүүдийн хоол хүнсийг нийлүүлж, нийтийн хоолны үйлчилгээ үзүүлснээр жилд 80 тэрбум рублийн орлого олдог байсан" гэж Путин цохон тэмдэглэв.
Түүнчлэн Вагнер группт олгосон энэ их хэмжээний мөнгийг хэрхэн зарцуулсан болохыг эрх баригчид шалгахаар болсон гэжээ.
Хэрэв энэ удаагийн зэвсэгт бослогыг дарж чадаагүй бол гадны улс орнууд энэ үеийг далимдуулах байсан гэж тэрээр мөн өгүүлэв.
"Хэрэв бослого амжилттай өрнөсөн бол ОХУ-ын дайснууд үүнийг далимдуулж, сүүлийн жилүүдэд гарсан олон ололт амжилтаа үгүй хийх байсан нь гарцаагүй. Гэхдээ ийм зүйл болоогүй ба цаашид ч ийм зүйл тохиохгүй гэдэгт найдаж байна” хэмээн тэрээр үргэлжлүүлсэн байна.
Мөн энэ үеэр Украины дайнд оролцож буй цэргүүд ОХУ-ын Батлан хамгаалах яамны командлалын дагах ёстойг дахин сануулав.
"Цэргийн удирдлагын гол тулгуур нь зөвхөн ойрын ирээдүйд төдийгүй тулалдаанд өөрсдийгөө хангалттай харуулсан хүмүүсээс бүрдэх ёстой” хэмээн Путин онцолжээ.
Эх сурвалж: SBS