Их Британи улсад шатахуун, хүнсний бүтээгдэхүүний үнэ эрчимтэй өсөх болсноор бусад бараа бүтээгдэхүүний үнэ сүүлийн 40 жилийн хугацаан дахь хамгийн хурднаар өсөх болжээ.

Тус улсын Үндэсний Статистикийн албанаас мэдэгдсэнээр, Их Британи улсын инфляц өнгөрөгч зургаадугаар сард 9.4 хувьд хүрсэн гэнэ. Улмаар шатахууны үнэ литр тутамдаа 18.1 пеннигээр өссөн бол сүү, бяслаг, өндөгний үнэ мөн эрчимтэй өссөн байна.

Үйл явдлын хүрээнд үйлдвэрчдийн эвлэлүүд ажилчдын цалинг нэмэхийг шаардах болсон юм. Гэвч засгийн газраас ажилчдын цалинг огцом нэмэх нь инфляцын өсөлтийг бүр л нэмэгдүүлэх эрсдэлтэйг анхааруулж байгаа ажээ.

Одоогийн байдлаар тус улс инфляцын түвшнээрээ Европ тивдээ тэргүүлж байгаа юм. Харин ХБНГУ 8.2 хувийн инфляцтайгаар Европ тивдээ удаалж байна.

Гэвч Английн Төв банкнаас анхааруулж байгаагаар энэ жилд тус улсын инфляц 11 хувьд хүрэх юм.

Эх сурвалж: BBC