Бага өртөгтэй нислэг үйлддэг JetBlue Эйрвэйс компани Spirit Эйрлайнсыг 3.8 тэрбум ам.доллароор худалдан авах болжээ. Ингэснээр тэд АНУ-ын тав дахь том авиакомпани болох юм.
Гэхдээ худалдааг эцсийн байдлаар шийдвэрлэхээс өмнө тэдний гэрээг АНУ-ын монополчлолыг зохицуулах газраас зөвшөөрөх ёстой гэнэ.
Хоёр авиакомпанийн хувьд хоёул бага өртөгтэй нислэг үйлддэг бөгөөд олон сарын турш үнэ хаялцаж хэлэлцсэний эцэст пүрэв гарагт тохиролцоонд хүрсэн байна.
Spirit Эйрлайнсын хувьд компаниа зарах шийдвэрийг аль эрт гаргасан ч JetBlue Эйрвэйсийн саналыг хүлээж авалгүй өдийг хүргэсэн юм. Учир нь Spirit Эйрлайнсын зүгээс Frontier гэх авиакомпанитай нэгдэхээр төлөвлөөд байсан бөгөөд талууд хоёрдугаар сард компаниудаа нэгтгэх төлөвлөгөөг танилцуулаад байжээ. Гэвч компанийг нэгтгэх санал хураалтын ажил дөрвөн ч удаа хойшилсноор өнгөрөгч лхагва гарагт талууд гэрээгээ цуцалсан юм.
Улмаар пүрэв гарагт тэд компаниа JetBlue Эйрвэйст зарах болсноо мэдэгджээ. Тийнхүү талуудын зүгээс худалдааг 2024 оны эхний хагаст эцэслэгдэнэ гэж найдах болжээ.
Эх сурвалж: Al Jazeera