Энэтхэгийн засгийн газар онлайн тоглоомын тэмцээнд түрүүлсэн иргэдэд ур чадвараар эсвэл азаар хожсон эсэхээс үл хамаарч 28 хувийн татвар ногдуулах шийдвэр гаргажээ.

Татварын албаны мэдээлснээр тус улсад сүүлийн гурван жилд онлайн тоглоомын хожлын сан ойролцоогоор 7.2 тэрбум ам.доллар хүрч нэмэгдсэн байна. Улмаар эрх баригчид сүүлийн хоёр жил онлайнаар хожсон мөнгөө албан татварт мэдүүлэхийг иргэдээс шаардах болжээ. Есдүгээр сарын 2 өдрөөс өмнө мэдүүлэх ёстой тус тайланг өнөөдрийн байдлаар 20,000 гаруй иргэн илгээсэн бөгөөд үлдсэн мэдүүлээгүй татварын дүн 6 сая орчим ам.доллар болж байна.

Энэтхэгийн онлайн тоглоомын салбарт ийнхүү 28 хувийн “бүтээгдэхүүн үйлчилгээний татвар” тогтоож буй нь дөнгөж хөгжиж эхэлж буй тус салбарын хөгжилд тушаа болох магадлалтай. Уг шийдвэр онлайн тоглоомын тэмцээнээс гадна цахим мөрийтэй тоглоом, бооцоот морин уралдаанд хамаарна. Тэмцээнд ур чадвараар түрүүлсэн, азаар тэргүүлсэн эсэхээс үл хамааран татварыг жигд тогтоож байна.

2020-2021 оны санхүүгийн жилд тус салбар 13,600 сая рупигээр хэмжигдэж байсан. Харин 2025 онд багадаа хоёр дахин тэлж 29,000 сая рупи хүрэх магадлалтай хэмээн KPMG-ийн тайланд дурджээ.

Эх сурвалж: Quartz