Даваа гарагт Ford компани F-150 Lightning цахилгаан автомашиныхаа үнийг 10,000 орчим ам.доллароор буулгаж байгаагаа мэдэгджээ.
2021 оны дундуур худалдаанд гарсан тус автомашины үнэ бараа материалын үнийн өсөлтөөс үүдэн хэд хэдэн удаа өссөн юм. Гэвч дэлхий дахины бараа бүтээгдэхүүн нийлүүлэлтийн асуудал намжихад цахилгаан автомашины салбар дахь өрсөлдөөн эрчимжсэнээр 2022 оны сүүлээс тус загварын автомашины борлуулалт тасралтгүй буурсан билээ. Улмаар өрсөлдөгч компаниуд нь цахилгаан автомашиныхаа үнийг буулгаж буй энэ үед Ford компани ч F-150 Lightning цахилгаан автомашиныхаа үнийг бууруулахаар шийдвэрлэсэн байна.
Тийнхүү үнийг бууруулснаар тус загварын автомашины нэгжийн үнэ өдгөө 50,000 ам.доллар хүрэхгүй болжээ. Харин F-1580 Lightning автомашины Platinum гэх илүү өндөр хүчин чадалтай хувилбарын үнэ 6,000 гаруй ам.доллароор буурсан байна. Ингэснээр тус загварын хамгийн үнэтэй хувилбарын нэгжийн үнэлгээ 92,000 орчим ам.доллар болжээ.
Эх сурвалж: CNN