Өнгөрөгч нэгдүгээр сарын 25-ы өдөр Индонезийн Батик Эйр авиакомпанийн Сулавесигээс Жакарта хотыг чиглэсэн нислэгт хоёр нисгэгч хоёул унтсан хэрэг гарчээ. BBC сувгаас мэдээлснээр нисгэгчид нийт 28 минутын турш унтсан байна. Улмаар өдгөө холбогдох албаныхан хэргийг шалгаж буй бөгөөд түр хугацаанд нисгэгчдийн нисэх эрхийг нь түдгэлзүүлээд байгаа ажээ.
Нийт 153 зорчигч тээвэрлэж явсан Эйрбус А320 агаарын хөлгийн хувьд хэдийгээр нисгэгчид нислэгийн үеэр унтсан ч ямар нэг осол эндэгдэлгүй амжилттай газардаж, зорьсон газраа хүрсэн юм.
Албаныхны мэдээлж байгаагаар нисгэгчдийн нэг нь саяхан хоёр ихрийн аав болсон ба хоёр нярай хүүхдээ асарч ядрахдаа ажлын байран дээрээ унтсан гэнэ. Тодруулбал, 32 настай нисгэгч нь амрах хэрэгтэй байгаа учир унтлаа хэмээн хоёрдугаар нисгэгчдээ мэдэгдсэн бөгөөд хоёрдугаар нисгэгч нь ч зөвшөөрсөн хэдий өөрөө бас унтаж орхисон байна.
Гэхдээ нисгэгчдийн нислэгийн өмнөх үзлэгийн дүнг харвал, тэдний цусны даралт хэвийн, мөн ямар нэг алкоголь хэрэглэсэн шинж байгаагүй, нислэг үйлдэхэд асуудалгүй гэсэн дүн гарч байжээ.
Тийнхүү хэрэг өдгөө шалгалтын шатанд явж байгаа бөгөөд уг асуудалд албаныхан Батик Эйр авиакомпанийг буруутгаж байгаа юм. Тэдний хэлж байгаагаар авиакомпани нисгэгчдийнхээ ажил, амралтын цагт сайтар анхаарал хандуулах хэрэгтэй гэж үзжээ.
Эх сурвалж: BBC