Даваа гарагт цахилгаан автомашин үйлдвэрлэгч Тесла компанийн нэгж хувьцааны үнэлгээ 8.4 хувиар унажээ. Нью Йорк хотын хөрөнгийн биржээс мэдээлснээр нэгж хувьцааны үнэлгээ ийн унасан нь тус компанийн гуравдугаар улирлын тайлантай холбоотой гэнэ.
Тодруулбал, Тесла өнгөрөгч улиралд нийт 358 мянган ширхэг автомашин нийлүүлэх төлөвтэй байсан ч ердөө 348,300 ширхэг автомашиныг л нийлүүлсэн байна. Ингэснээр 2022 онд автомашины нийлүүлэлтээ 50 хувиар өсгөх тэдний төлөвлөгөө хүрэхэд бүр л хүнд болжээ.
Харин ТАСС мэдээллийн агентлагаас мэдээлж байгаагаар хувьцааны үнэлгээ унахад Теслагийн үүсгэн байгуулагч ноён Маскийн жиргээ ч нөлөөлсөн гэнэ.
Тийнхүү мягмар гарагийн 15:00 цагийн байдлаар Тесла компанийн нэгж хувьцаа дэлхийн зах зээлд 242.40 ам.доллароор үнэлэгдэж байна.
Эх сурвалж: ТАСС