Энэтхэгийн агаарын тээвэрлэгч IndiGo компани агаарын хөлөг худалдан авалтын түүхэн дэх хамгийн том захиалгыг хийлээ. Тодруулбал, Парисын агаарын шоуны үеэр тэд Эйрбус А320 загварын онгоцноос нийт 500 ширхгийг худалдан авахаар захиалсан байна. Урьд өмнө ямар ч авиакомпани ийм том худалдан авалтыг хийж байгаагүй ажээ.
Тийнхүү нийт 55 тэрбум ам.доллароор хэмжигдэх захиалгыг 2030-2035 онд нийлүүлж дуусах гэнэ.
Захиалгын хүрээнд IndiGo авиакомпаниас мэдээлснээр шинэ агаарын хөлгүүд тэдний үйл ажиллагааны зардлыг бууруулж, түлш зарцуулалтыг сайжруулах юм.
IndiGo авиакомпани энэхүү захиалгыг хийхээс өмнө тэдний өрсөлдөгч Эйр Индиа авиакомпани өнгөрөгч хоёрдугаар сард Эйрбус болон Боинг компаниудаас нийт 470 ширхэг агаарын хөлөг худалдан авахаар гэрээлсэн билээ. Үүнээс үзвэл Энэтхэгийн агаарын тээвэрлэгчид цар тахлын дараагаар агаарын тээврийн салбар хурдацтай өсөхөд ихээхэн итгэж байгаа юм.
Эх сурвалж: BBC