Их Британийн ерөнхий сайд асан Лиз Трасс тус албыг ердөө 45 хоног хашиж, огцрох хүсэлтээ өгснөөр өнгөрөгч долоо хоногийн сүүлээр Торигийн танхим шинэ ерөнхий сайдыг долоохон хоногийн дотор сонгох хүндхэн ажилд томилогдсон билээ.

Улмаар ерөнхий сайдад Сангийн сайд Риши Сунак, ерөнхий сайд асан Борис Жонсон нар нэр дэвшиж байсан ч ноён Жонсон сунгаанаас нэрээ татсанаар Риши Сунак Их Британийн анхны Энэтхэг гаралтай ерөнхий сайд болох болсон юм.

Тэгвэл түүний шинэ албан тушаал олон мянган энэтхэг хүний сэтгэл зүрхэнд хүрчээ.

Үйл явдлын хүрээнд Риши Сунак энэтхэг сонинуудын гол сэдэв болсон байна. Таймс оф Индиа л гэхэд түүний талаар бичсэн нийтлэлдээ “хинду” гэдэг үгийг нийт 5 удаа дурдсан бол энэтхэгийн Дайник Бхаскар сонин, “Дивали баярыг тохиолдуулсан бас нэг бэлэг, Энэтхэг гаралтай Риши цагаан арьстнуудыг удирдах боллоо” гэсэн гарчигтай нийтлэл хэвлэжээ.

Риши Сунакын хувьд өдгөө 42 настай бөгөөд түүний эцэг эх нь Африкт төрсөн Энэтхэг гаралтай хүмүүс юм. Тэд түүнийг төрөөгүй байхад Зүүн Африкаас Их Британи руу цагаачилж байжээ.

Эх сурвалж: BBC