Өнгөрөгч долоо хоногт тэрбумтан Илон Маск Твиттер компанийг 44 тэрбум ам.доллароор худалдан авсан билээ. Худалдан авалттай холбогдуулан олон улсын хэвлэлүүд түүнийг Твиттерт 75 хүртэлх хувийн орон тооны цомхотгол хийнэ хэмээн мэдээлээд байсан юм. Тэгвэл Илон Маск энэхүү мэдээллийг худал хэмээн мэдэгджээ.

Тодруулбал, амралтын өдрүүдэд Нью Йорк Таймс сониноос ноён Маскийг Твиттерийн ажиллах хүчин дунд орон тооны томоохон цомхотгол хийх тушаал гаргасан гэж мэдээлсэн юм. Улмаар үйл явдлын хүрээнд Твиттерийн нэгэн хэрэглэгч түүнээс лавлахад Илон Маск, “Энэ бол худал” гэж хариулсан байна.

Илон Маск Твиттерийг худалдан авснаас хойш хүмүүс Твиттерийн ирээдүйд ихээхэн санаа зовних болсон юм. Тийнхүү Твиттерийн бүтцийн хүрээнд элдэв таамгийг дэвшүүлэх болсон нь “баталгаажсан хэрэглэгчийн тэмдэг эзэмшигчид сар тутам 20 ам.доллар төлдөг болно, Твиттер Vine-тай адилхан болно, Твиттер дээр эмх замбараагүй байдал үүснэ” хэмээж байгаа билээ. Улмаар худалдан авалтаас үүдэн зарим нэг алдартан платформыг орхих болсноо ч зарлаад байгаа юм.

Эх сурвалж: BBC