Саяхан Твиттерийг худалдан авсан тэрбумтан Илон Маск тус компанийн захирлуудын зөвлөлийг тарааж, өөрөө гүйцэтгэх захирлын албыг хаших болжээ.

Илон Маскийн хувьд Твиттерээс гадна SpaceX, Neuralink, Boring Company болон Tesla гэх дөрвөн компанийг удирддаг юм.

Тийнхүү шинэ албаа хүлээн авсан ноён Маск “баталгаажсан хэрэглэгч” гэсэн тэмдэг олгох үйл явцад өөрчлөлт оруулахыг санаачилсан байна. Улмаар хэвлэлүүдийн мэдээлж байгаагаар Твиттер тус тэмдгийг эзэмшигчдээс сар бүр 20 ам.долларын хураамж авахаар зэхэж байгаа юм.

Энэ тухай сонссон зохиолч Стефен Кингийн зүгээс ганц тэмдгийн төлөө сард 20 ам.доллар төлөх хүсэлгүй байгаагаа илэрхийлэхэд Маск, “Тэгвэл 8 ам.доллар байвал ямар байна?” гэж асуужээ.

Өдгөө Твиттер компани цор ганц захиралтай үйл ажиллагаа явуулж байгаа бөгөөд Илон Маскийн мэдэгдсэнээр энэ нь түр хугацааны арга хэмжээ гэсэн байна.

Эх сурвалж: The Reuters