Америкийн Харилцаа холбоог зохицуулах хороо TikTok-ийг хориглох нь зөв гэж үзэж байна. Тус аппликейшн Хятадын толгой компанийн удирдлагад байдаг тул америк хэрэглэгчдийн мэдээллийг Хятадын засгийн газарт дамжуулах эрсдэлтэй гэв.

Харилцаа холбоог зохицуулах хороо TikTok-ийг шууд хянан зохицуулах эрх мэдэлгүй. Гэвч тус хорооноос өмнө нь Huawei зэрэг хятад компанийн талаар санаа зовниж буйгаа илэрхийлсний дараа Конгресс Huawei-ийн эсрэг арга хэмжээ авч байсан юм. Өдгөө TikTok-ийн толгой компани ByteDance тус аппликейшнээ Америкийн компанийн удирдлагад шилжүүлэх замаар АНУ дахь үйл ажиллагаагаа хэвийн үргэлжлүүлэх боломжтой эсэхийг судалж байна. ByteDance одоо ч америк хэрэглэгчдийн мэдээллийг Хятадын нутаг дэвсгэрээс гадуур хадгалдаг тул аюулгүй бөгөөд Хятадын засгийн газрын зааварчилгааг заавал биелүүлэх шаардлагагүй хэмээн өөрсдийгөө өмгөөллөө. Трампын засаг хоёр жилийн өмнө тус программыг АНУ-д хориглох оролдлого хийж байсан ч амжилттай хэрэгжээгүй. TikTok-ийг Америкт 200 сая гаруй удаа татан авчээ.

Эх сурвалж: Axios