Боксын дэлхийн 4 удаагийн аварга Канело Альварес Аргентины хөл бөмбөгийн од Лионель Мессид хатуу анхааруулга өгчээ.
Тодруулбал, өнгөрөгч бямба гарагт Аргентин улсын шигшээ баг Мексикийн баг бүрэлдэхүүнийг 2:0 харьцаатай хожсоны дараагаар тэд хувцасны өрөөнд баяраа тэмдэглэж буй бичлэг цахим орчинд түгсэн юм. Бичлэгээс үзвэл Мексикийн шигшээ багийн өмсгөл шалан дээр хэвтэж байх бөгөөд Аргентины хөл бөмбөгч Лионель Месси өмсгөлийг хөлөөрөө хөдөлгөж үзэгдэх ажээ. Улмаар эл үйлдлийг үзсэн Мексикийн ард иргэд түүнийг улсынх нь төрийн далбааг хүндэтгэсэнгүй гэж үзсэн байна.
Үйл явдлын хүрээнд мексик боксчин Канело Альварес өөрийн Твиттер хуудаснаа хэд хэдэн жиргээ нийтэлж, Лионель Мессид анхааруулга өгсөн юм. Түүний жиргэснээр, “Месси манай шигшээ багийн өмсгөл, төрийн далбаагаар шал арчихыг та нар харав уу?”, “Тэр надтай битгий таараасай гэж бурхнаас гуйсан дээр” гэжээ.
Эх сурвалж: NBC News