Хиймэл оюун ухааны технологид суурилсан ChatGPT чатботыг хөгжүүлэгч OpenAI компанийн гүйцэтгэх захирал Сэм Альтман тэрбумтнуудын эгнээнд нэгджээ.
Америкийн эдийн засгийн төрөлжсөн сэтгүүл болох Forbes-ийн мэдээлснээр, 9-ний өдөр Сэм Альтман 1 тэрбум ам.доллароос дээш хөрөнгөтэй тэрбумтнуудын жагсаалтад багтах болсон талаар онцлов. Forbes сэтгүүлийн зүгээс орон нутгийн цагаар өнгөрөгч 2-ны өдөр тэрбумтнуудын жагсаалтыг шинэчлэн гаргасан бөгөөд 2781 тэрбумтнуудыг хөрөнгийн хэмжээгээр нь жагсаасан энэхүү жагсаалтын 2692-т Альтман бичигдсэн байна.
2022 онд ChatGPT-г олон нийтэд танилцуулж байсан Сэм Альтман дэлхийн хиймэл оюун ухааны “галзуурлыг” түүчээлж хөрөнгөжсөн эрхэм юм. Нью-Йоркийн хөрөнгийн биржид саяхан бүртгэлтэй болсон нийгмийн сүлжээний Reddit, онлайн төлбөр тооцооны Stripe зэрэг гарааны компаниудад хөрөнгө оруулалт хийж хөрөнгөө зузаатгасан талаар Financial News сонин онцолжээ.
Түүнчлэн өдгөө 38 настай тэрээр цөмийн эрчим хүчний Helion компани болон олон жилийн турш үйл ажиллагаа явуулж буй Retro Bioscience зэрэг венчур компаниудад хөрөнгө оруулалт хийсэн нь ихээхэн амжилтыг дагуулсан байна.
Тэрээр мөн Microsoft компанийн хөрөнгө оруулалттай OpenAI венчур хөрөнгийн санг эзэмшдэг байсан юм.
Калифорни муж болон Хавайн арал дахь үл хөдлөх хөрөнгө зэрэг түүний бүх хөрөнгийг баримт, судалгаанд үндэслэн тооцоолсон гэж Forbes сэтгүүл цохон тэмдэглэсэн байна.
Эх сурвалж: Newsis