Олон нийтийн цахим сүлжээний Twitter платформ хурдацтай өсөж буй өрсөлдөгч Threads платформын эсрэг хуулийн арга хэмжээ авах эсэхийг авч үзэж байгаагаа мэдэгджээ.
Өнгөрөгч долоо хоногийн лхагва гарагт хэрэглээнд нэвтэрсэн Thread аппликейшны хувьд Twitter платформоос нэг их ялгарахгүй бөгөөд Meta компанийн зүгээс ч шинэ аппликейшнаа сурталчлахдаа Twitter платформын илүү нөхөрсөг хувилбар хэмээсэн юм. Олон нийтийн дунд Twitter компанид урд ажиллаж байсан хүн Threads аппликейшныг бүтээхэд туслалцаа үзүүлсэн гэх яриа түгэх болсноор Илон Маск, “Өрсөлдөөн байж болно, гэхдээ хуулж болохгүй” гэж жиргэсэн билээ. Тэгвэл Meta компаниас тус яриаг няцаасан ч технологийн салбарт тэргүүлэгчдийн сөргөлдөөн дуусгавар болох болоогүй бололтой.
Ташрамд дурдахад, Twitter платформын хувьд өөр дээрээ нийт 350 сая хэрэглэгчийг төвлөрүүлсэн байдаг бол Threads аппликейшн хэрэглээнд нэвтэрснээсээ хойш нийт 70 сая хэрэглэгчийг төвлөрүүлээд байгаа юм. Харин холбогдох байгууллагаас мэдээлж байгаагаар Twitter платформ мөн тооны хэрэглэгчийг төвлөрүүлэхэд дор хаяж 4 жилийг зарцуулсан гэжээ.
Эх сурвалж: BBC