OpenAI компанийн гүйцэтгэх захирал Сэм Алтман даваа гарагт Worldcoin криптовалютын төслөө эхлүүлжээ.

Энэхүү төслийн гол онцлог нь тэд хэрэглэгчдэд World ID буюу зөвхөн хүмүүсийн авч чадах бүртгэлийг үүсгэж өгдөг юм. World ID бүртгэлтэй болохын тулд хэрэглэгчид биечлэн Worldcoin-ийн “orb” гэх хүүхэн хараа таних технологиор өөрийгөө таниулах гэнэ. Улмаар тус технологи таныг бодит хүн болохыг баталсан нөхцөлд World ID бүртгэл үүсэх ажээ. Өдгөө тус төсөл нь дэлхийн 20 орны 35 хотод хэрэгжиж байгаа гэнэ. Харин төсөлд нэгдэж, бүртгэлээ үүсгэсэн зарим улсын иргэдэд Worldcoin төслийн WLD коиныг өгч байгаа юм.

Төслийн хүрээнд холбогдох хүмүүсийн хэлж байгаагаар World ID бүртгэл нь хиймэл оюун ухаан бүхий чатботуудын эрин үед хэрэгтэй гэсэн байна. Учир нь уг бүртгэлийг ашиглан цахим орчинд жинхэнэ хүн, хиймэл оюун ухаан бүхий чатботыг ялгах ажээ.

Эх сурвалж: The Reuters