Даваа гарагт танилцуулсан урьдчилсан тооцоогоор евро бүсийн инфляц буурч, эдийн засаг нь шинжээчдийн тооцож байснаас илүү өсөлттэй гарчээ. Гэвч эдийн засагчдын зүгээс евро бүсийг эдийн засгийн хямралд орох эрсдэлээс бүрэн ангижраагүй гэж түгшиж байгаа юм.
CNBC сувгаас мэдээлснээр долоодугаар сард тус бүсийн инфляц 5.3 хувьд хүрч буурсан гэнэ. Энэ нь зургаадугаар сард бүртгэгдсэн инфляцаас 0.2 хувиар бага үзүүлэлт ажээ. Гэсэн хэдий ч Европын Төв банкны инфляцын зорилтот түвшнээс тус тоо хангалттай их байгаа юм. Тодруулбал, Европын Төв банкнаас инфляцыг 2 хувьд барихаар зорьж байгаа билээ.
Мөн тус бүсийн суурь инфляц долоодугаар сард 5.5 хувьтай буюу өнгөрөгч сарын үзүүлэлтээс огт өөрчлөгдөөгүй үзүүлэлттэй гарсан нь бодлого боловсруулагчдад сэтгэл гонсойлгосон мэдээ болж хүрэх нь гарцаагүй юм. Европын Төв банкны зүгээс инфляцыг бууруулахаар өнгөрөгч долоо хоногт бодлогын хүүгээ 25 суурь нэгжээр өсгөсөн бөгөөд үүний дүнд тус бүсийн бодлогын хүү 3.75 хувьд хүрсэн.
Харин тус бүсийн эдийн засгийн өсөлтийн хувьд өнгөрөгч улиралд 0.3 хувийн өсөлттэй гарснаар шинжээчдийн таамаглалыг давсан байна. Гэсэн хэдий ч эдийн засагчид евро бүсийг хямралд орж магадгүй гэсэн таамгаа өөрчлөөгүй ажээ.
Эх сурвалж: CNBC