Баасан гарагт Илон Маскийн худалдан авсан Твиттер компанийн төв оффисын дээвэр дээр X үсэг бүхий шинэ лого сүндэрлэжээ.

Твиттер компанийн хувьд саяхан ре-брэндинг хийх ажлаа эхлүүлсэн бөгөөд тус ажлын хүрээнд платформ дээрх цэнхэр шувуу бүхий логог X үсгээр сольж, платформын нэрийг ч X болгон солиод амжсан. Тэгвэл өнгөрөгч долоо хоногийн баасан гарагт тэд төв оффисынхоо дээр X үсэг бүхий логогоо сүндэрлүүлжээ. Гэвч олон нийтийн зүгээс нэн ялангуяа тус оффисын байгууламжийн ойр орчим амьдардаг хүмүүс эл үйлдэлд ихээхэн шүүмжлэлтэй хандаж байгаагаа илэрхийлсэн байна.

Хүмүүсийн гомдоллож байгаагаар X лого нь шөнө маш тод гэрэлтдэг учир унтлагын өрөөнийх нь цонхоор тусаж, түвэг учруулж байгаа гэнэ. Улмаар Сан Франциско хотын Барилга хяналтын хэлтсээс эл хэргийг шалгах болжээ.

Эх сурвалж: The Reuters