Даваа гарагт Хонконгийн Экономик Таймс сониноос мэдээлснээр цахилгаан автомашин үйлдвэрлэн нийлүүлэгч Tesla компани тус бүсийн зах зээлд борлуулах автомашинуудынхаа үнийг бууруулахаар төлөвлөжээ.
Тодруулбал, Tesla компани Model 3, Model Y загварын автомашинуудынхаа үнийг 6-11.9 хувиар бууруулах болсон гэнэ. Улмаар энэ долоо хоногийн баасан гарагаас эхлэн Хонконгийн зах зээлд энэ 2 загварын автомашин хямдарсан үнээр борлуулагдах ажээ.
Хэвлэлийнхний мэдээлж байгаагаар тус шийдвэрийн хүрээнд Model 3 загварын үнэ 341,200-406,900 хонконг долларын хооронд хэлбэлзэх бол Model Y загварын үнэ 367,100-428,700 хонконг долларын хооронд хэлбэлзэх гэнэ. Хэдийгээр Хонконгийн Экономик Таймс сонин болон бусад хэвлэлийнхний зүгээс ийн мэдээлж байгаа ч Tesla компани энэ тухайд албан мэдэгдэл гаргаагүй байна.
Эх сурвалж: The Reuters