Пүрэв гарагт CNN сувгаас мэдээлснээр энэ долоо хоногт АНУ-ын ипотекийн зээлийн хүү өсөж, сүүлийн 21 жилийн хугацаан дахь хамгийн өндөр үзүүлэлтэд хүрчээ. Улмаар пүрэв гарагт тус улс дахь ипотекийн зээлийн хүү 7.09 хувьд хүрсэн гэнэ.
АНУ дахь ипотекийн зээлийн хүүгийн хувьд өнгөрөгч оны мөн үед 5.13 хувьтай байсан юм. CNN сувгаас мэдээлснээр тус улсын ипотекийн зээлийн хүү өнгөрөгч тавдугаар сараас хойш 6.5 хувиас буугаагүй бөгөөд долоодугаар сарын сүүлээс хурдацтай өсөж эхэлсэн гэнэ. Тус улсын түүхэн ипотекийн зээлийн хүү хамгийн сүүлд 2002 оны дөрөвдүгээр сард 7 хувийг давж байжээ.
Ипотекийн зээлийн хүү ийн өсөхөд нөлөөлсөн хамгийн гол хүчин зүйл нь ХНС-ийн бодлогын хүүгээ өсгөх бодлого юм. Тийнхүү бодлогын хүү нэмэгдэхийн хэрээр АНУ-д байр худалдан авах нь илүү үнэтэй болж, зах зээлд байрны худалдаа 2022 онтой харьцуулахад 20 хувиар буурсан байна.
Эх сурвалж: CNN