АНУ-ын Цагаан ордны зүгээс орон нутгийн цагаар 23-ны өдөр мэдэгдэхдээ “Ковид-19” цар тахлын эсрэг вакциныг бүтээх явцад шинээр үүссэн вакцины технологи болох mRNA (messenger RNA)-г ашиглан хорт хавдрын эсрэг вакцин боловсруулах төсөлд хөрөнгө оруулахаа онцоллоо.

АНУ-ын ерөнхийлөгч Жо Байдены хорт хавдрын эсрэг “Cancer Moonshot" төслийн тайлангийн талаар ярих үеэрээ “Хорт хавдар болон бусад өвчинтэй тэмцэхэд mRNA технологийг үр ашигтайгаар ашиглах зорилго бүхий “CUREIT” төсөлд 24 сая ам.долларын хөрөнгө оруулалт хийхээ мэдэгдэж байна” хэмээн цохон тэмдэглэв.

Тус төслийг АНУ-ын Атланта муж дахь Emory их сургуулийн судалгааны баг удирдан явуулах аж.

Ерөнхийлөгч Байден "Хорт хавдартай тэмцэх хүн төрөлхтөний дархлааг сайжруулахад mRNA технологийг ашиглах болно” хэмээн өгүүлсэн бол Цагаан ордон "Энэ технологийг аутоиммун өвчин төдийгүй эрхтэн шилжүүлэх ажилбар, халдварт өвчний үед ч ашиглах боломж бүрдэнэ гэдэгт эргэлзэхгүй байна” хэмээн тайлбарлажээ.

Тухайн вируст тохирох эсрэг биетийг үйлдвэрлэх зааварчилгааг хүний биед кодлох арга буюу вакцины mRNA шинэ технологи нь цар тахлын эсрэг вакциныг боловсруулж байх үеэс л олны анхаарлыг ихээхэн татсан бөгөөд Pfizer болон Moderna компаниуд энэхүү технологийг ашиглан цар тахлын эсрэг вакциныг бүтээсэн билээ.

Эх сурвалж: MBC