Орон нутгийн хэвлэл мэдээллийн хэрэгслүүдийн 4-ний өдөр мэдээлснээр ОХУ иргэдийнхээ хориотой нийгмийн сүлжээнд хандах хандалтыг хязгаарлах үүднээс VPN буюу хувийн виртуал сүлжээний үйлчилгээг хаахаар төлөвлөжээ.

Эрх баригч Нэгдсэн Орос намын сенатор Артём Шайкин мэдэгдэхдээ ирэх оны гуравдугаар сарын 1-нээс эхлэн ОХУ-ын харилцаа холбооны хяналтын байгууллага болох Харилцаа холбоо, мэдээллийн технологи, олон нийтийн харилцааны хяналтын алба VPN үйлчилгээг хаах төлөвлөгөөтэй байгааг онцлов.

Тодруулбал Сенатын Дижитал эдийн засгийг хөгжүүлэх хорооны дэд дарга Шайкин “ОХУ-д ашиглахыг хориглосон платформ болон сайтуудад нэвтрэх боломжийг олгодог VPN үйлчилгээг хаах шийдвэр ирэх оны гуравдугаар сарын 1-нээс хэрэгжиж эхэлнэ” хэмээн өгүүлсэн байна.

Түүний дурдсан “хориотой платформ болон сайт” гэдэг нь АНУ-ын Meta компанийн үйл ажиллагааг нь хариуцан явуулдаг Facebook, Instagram, WhatsApp зэрэг нийгмийн сүлжээний томоохон платформуудыг хэлж буй аж. ОХУ-ын засгийн газар өнгөрсөн оны хоёрдугаар сард анх Украин руу халдан довтолж байх үедээ “хуурамч мэдээ” тараасан гэх нэрийдлээр барууны нийгмийн сүлжээний платформуудыг хаах арга хэмжээ авч байсан билээ. Гэсэн хэдий ч Оросын залуу үеийнхэн VPN үйлчилгээгээр дамжуулан эдгээр нийгмийн сүлжээний платформуудыг өнөөдрийг хүртэл ашигласаар байгаа юм.

VPN үйлчилгээний талаар олон улсын хэмжээнд судалдаг Top10VPN компанийн зүгээс мэдэгдэхдээ өнгөрсөн оны гуравдугаар сард ОХУ-д Instagram-ын хэрэглээг хориглосны дараа VPN үйлчилгээний эрэлт 2692 хувиар өссөн болохыг тогтоожээ.

Эх сурвалж: Asiae