АНУ-ын Автомашины ажилчдын нэгдсэн үйлдвэрчний эвлэлийн гишүүд нэлээд өргөн цар хүрээтэйгээр ажил хаялт зарлаад байгаа энэ үед эрүүл мэнд, эмнэлгийн салбарын 75.000 ажиллагсад мөн л ажил хаялт зарлахаар төлөвлөж эхэлжээ.

CNN агентлагийн орон нутгийн цагаар 1-ний өдөр мэдээлснээр, сүлжээ эмнэлгийн салбартаа Америктаа тэргүүлэгч Kaiser Permanente эмнэлгийн үйлдвэрчний эвлэл энэ сарын 4-7-ны хооронд түр ажил хаяхаар төлөвлөж байгаа талаар онцолсон байна. Тус эмнэлгийн үйлдвэрчний эвлэл 75.000 гишүүнтэй аж.

Цар тахал дэгдсэнээс хойш тус улсын эмнэлэг, эрүүл мэндийн үйлчилгээний салбар ажиллах хүчний хомсдолд ороод байгаа бөгөөд Kaiser Permanente эмнэлгийн ажилчид ажил хаялт зарласнаар томоохон хотуудын эмнэлгийн байгууллагууд хэвийн ажиллахад хүндрэл учрах төлөвтэй байна.

Тус эмнэлгийн зүгээс уг асуудалтай холбогдуулан мэдэгдэл хийхдээ “”Ковид-19” цар тахал ид дэгдэж байх үед буюу 2021-2022 оны хооронд АНУ-ын эрүүл мэндийн салбарын 5 сая гаруй ажилтан ажлаа орхисон бөгөөд одоо ажиллаж буй ажиллагсдын гуравны хоёр нь ажлын ачааллаас үүдэн 20 орчим хувь нь ажлаа орхиход бэлэн байна” хэмээн цохон тэмдэглэжээ.

CNN агентлагийн мэдээлснээр, үйлдвэрчний эвлэлийнхэн ирэх хоёр жилийн хугацаанд цалинг 6.5 хувиар, дараагийн хоёр жилд 5.75 хувиар нэмэгдүүлэхийг шаардаж байгаа бол удирдлагуудын зүгээс 4 болон 3 хувиар тус тус нэмэгдүүлэхийг санал болгосон байна. Kaiser Permanente эмнэлгийн хэвлэлийн төлөөлөгч Хилари Коста хэлэхдээ “Хоёр талын хэлэлцээр нааштай байгаа ба ажил хаялт зарлах төлөвлөгөө бий гэж мэдэгдсэн болохоос яг ажил хаялт зарлах эсэх баттай бус” хэмээн өгүүлжээ. Харин үйлдвэрчний эвлэлийн тэргүүн Бетси Твитчелл "Удирдлагууд ажиллах хүчний хомсдолыг арилгахад шаардлагатай шийдлүүд болон эрүүл мэндийн ажилтнуудад тулгарч буй асуудлыг шийдэх талаар яаралтай авч хэлэлцэхгүй байгаа тохиолдолд харилцан тохиролцоонд хүрч чадахгүй" хэмээн сэтгэгдлээ илэрхийлсэн байна.

Үүний зэрэгцээ, Автомашины ажилчдын нэгдсэн үйлдвэрчний эвлэлийн зүгээс зохион байгуулж байгаа ажил хаялтад оролцож буй гишүүдийн тоо өнгөрсөн сарын 29-ний өдөр 7.000-аар нэмэгдэж, өдгөө 25.000 болоод буй билээ. Энэ нь тус үйлдвэрчний эвлэлийн нийт гишүүдийн 17 хувьтай тэнцэж буй юм. Ирэх дөрвөн жилийн хугацаанд цалингаа 40 хувиар нэмэгдүүлэхийг шаардаж байсан тус үйлдвэрчний эвлэлийнхэн саяхан 36 хувь болгон бууруулсан хэдий ч удирдлагуудын зүгээс 20 хувиар нэмэх саналыг тавьсан хэвээр байгаа аж.

Эх сурвалж: Maeil