General Motors болон Ford компаниуд дахин нийт 500 орчим ажилтнаа орон тооны цомхотголд оруулах болжээ. Эл шийдвэртээ тэд одоо ч үргэлжилж буй ажил хаялтыг буруутгасан байна.
Улмаар General Motors компаниас мэдэгдсэнээр тэд 164 ажилтнаа орон тооны цомхотголд оруулна гэсэн юм. Орон тооны цомхотгол нь тэдний Охайо болон Индиана муж дахь үйлдвэрүүдэд зохион байгуулагдах ажээ. Үйл явдлын хүрээнд General Motors компаниас гаргасан мэдэгдэлд өгүүлснээр, “Бид үүнийг удаа дараа хэлсэн. Ажил хаялт зарласнаар хэн ч хождоггүй. Энэ арга хэмжээ бол уг баримтын нотолгоо юм. Бидний зүгээс үйлдвэрчний эвлэлтэй аль болох түргэн хугацаанд хэлэлцээрт хүрэхийн тулд найдвар тээн зөвшилцөх болно” гэсэн юм.
General Motors компанийн хувьд урьд таван үйлдвэрийнхээ хүрээнд нийт 1,800 гаруй ажилтнаа орон тооны цомхотголд оруулаад байсан билээ. Тийнхүү эл шийдвэрийн дараагаар уг тоо 2,000 шүргэх болсон байна.
Харин Ford компани хоёр үйлдвэрийнхээ хүрээнд нийт 330 ажилтнаа орон тооны цомхотголд оруулах болсныг зарласан юм. Тэдний хувьд өмнө нь мөн 600 гаруй цагийн ажилтнаа орон тооны цомхотголд оруулаад байсан билээ.
Эх сурвалж: CNN