Цахилгаан автомашин үйлдвэрлэгч Тесла компани АНУ-ын зах зээлд борлуулагдаж буй “Model 3”, “Model Y”зэрэг зарим загварынхаа үнийг 2000 гаруй ам.доллароор бууруулжээ.

Тодруулбал тус компанийн албан ёсны сайтад мэдээлснээр “Model 3”-ын үндсэн загварын анхны үнэ 40,240 ам.доллар байсныг 38,990 ам.доллар болгон 1250 ам.доллароор бууруулсан гэв.

Тэрчлэн “Model 3-Long Range” болон “Model 3- Performance” загварын үнэ 47,240 ба 53,240 ам.доллараас тус бүр 1,250 болон 2,250 доллароор хямдарсан байна.

Түүнчлэн SUV ангиллын “Model Y” загварын үнийг 54,490 ам.доллароос 2000 ам.доллароор хямдруулжээ.

Ингэснээр тус компани хэрэглэгчдийн дунд хамгийн нэр хүндтэй, эрэлт ихтэй байдаг “Model 3” болон “Model Y” загваруудынхаа үнийг 2.7-4.2 хувиар бууруулаад байна. Компанийн зүгээс ийнхүү үнээ бууруулж буй шалтгаанаа тодорхой дурдаагүй юм.

Хэрэглэгчдийн зарцуулалт эрс багасч буйгаас гадна цахилгаан автомашины өрсөлдөөн ширүүсч байгаатай холбогдуулан тус компани өнгөрсөн оны сүүлчээс дэлхийн хэд хэдэн улс орнууд дахь автомашины үнээ бууруулж эхэлсэн билээ.

Ялангуяа цахилгаан автомашины салбарын хамгийн том зах зээл болох АНУ болон БНХАУ-д үнээ буулгаж, мөн өсгөх зэргээр хэд хэдэн удаа үнийн зохицуулалтыг хийсэн билээ.

Эх сурвалж: YTN