Даваа гарагт АНУ-ын төрийн дээд албан тушаалтан Энтони Блинкен, Израилийн ерөнхий сайд Бенжанмин Нетаньяхутай 7 цаг тасралтгүй уулзжээ. Тийнхүү уулзалтын дараагаар Йерусалем дахь АНУ-ын элчин сайдын яамнаас ноён Блинкен нэгэн мэдэгдлийг хийсэн нь АНУ-ын ерөнхийлөгч Жо Байден лхагва гарагт Израиль улсад айлчлах тухай байсан юм.
Айлчлалын гол зорилго нь ноён Байден Израиль дахь нөхцөл байдлыг өөрийн нүдээр харж, Израилийн дайны зорилго, стратегийн талаар дэлгэрэнгүй мэдээллийг авах гэнэ.
Энтони Блинкенийн хэвлэлийнхэнд хандан мэдэгдсэнээр, “Ерөнхийлөгч Жо Байден Израилийн тал хэрхэн иргэдэд хөнөөл багатайгаар цэргийн үйл ажиллагаагаа явуулахыг сонсож, Газын зурвас дахь палестинчуудад тусламж хүргүүлэх боломж нөхцөлийн талаар хэлэлцэнэ” гэсэн юм. Мөн түүний цохон тэмдэглэснээр Жо Байден Израиль улсад ерөнхий сайд Нетаньяхугийн урилгаар ирж байгаа гэжээ.
Эх сурвалж: BBC