Өнгөрөгч наймдугаар сард Япон улс Фукушимагийн цахилгаан станцын цацраг идэвхт усан хаягдлыг Номхон далайд цутгаж эхэлсэн билээ. Тэдний мэдэгдсэнээр эрдэмтэд цацраг идэвхт усан хаягдлыг хангалттай сайн цэвэршүүлсэн бөгөөд далайд цутгахад огтоос аюулгүй гэсэн юм. Гэсэн хэдий ч БНХАУ тус улсаас импортлох далайн гаралтай хүнсний бүтээгдэхүүнд хориг тавьж, Япон улс далайн бүтээгдэхүүний хамгийн том худалдан авагчаа алдсан билээ.
Тэгвэл мягмар гарагт Япон улс дахь АНУ-ын арми тэдний далайн бүтээгдэхүүнийг их хэмжээгээр худалдан авах болжээ.
Үйл явдлын хүрээнд Япон улсад суугаа АНУ-ын элчин сайд Рам Эмануэлийн тайлбарласнаар, энэ бол Вашингтоны Бээжинтэй эхлүүлсэн эдийн засгийн дайны нэг хэсэг гэсэн юм. Улмаар тэд цаашид Хятадын Япон улсаас импортлох далайн бүтээгдэхүүнд тавьсан хоригийг эсэргүүцэх өөр аргыг ч эрэлхийлж магадгүй гэжээ. Түүний өгүүлснээр АНУ Япон улсаас их хэмжээгээр худалдан авах далайн бүтээгдэхүүнийг цэргийн хоол хүнсэнд ашиглаж, Япон дахь Америкийн цэргийн баазуудын зоогийн газар, дэлгүүрүүдэд худалдана гэсэн юм.
Эх сурвалж: BBC