Лхагва гарагт Блумберг сувгаас мэдээлснээр Европын Холбоо Оросын алмазны импортод ирэх нэгдүгээр сарын нэгнээс хориг тавихаар төлөвлөж байна гэжээ. Хэрэв хориг тавигдваас энэ нь Европын Холбооны зүгээс ОХУ-ын эсрэг тавьсан арванхоёр дахь багц хориг болох юм.
Тэдний мэдээлсэн дагуу Европын Холбоо дан ганц ОХУ-аас импортлох алмаз эрдэнэд хориг тавихгүй харин Орос улсаас олборлосон алмазыг гуравдагч оронд боловсруулсан байх аваас мөн адил хориг тавих гэнэ.
Улмаар Европын Холбоо энэ долоо хоногтоо багтаан тус хоригийг хэлэлцэж, эцсийн байдлаар шийдвэрлэх бөгөөд ирэх долоо хоногоос батлах юм.
Эл мэдээллийн хүрээнд ТАСС мэдээллийн агентлагаас мэдээлснээр хэрэв хориг тавигдвал хориг хамаарах Оросын 30 гаруй байгууллага мөн хоригт орох гэнэ.
Эх сурвалж: ТАСС