Орон нутгийн цагаар 26-ны өдөр Унгарын эцсийн зөвшөөрлийг авснаар Швед улс НАТО-д албан ёсоор элсэх эрхээ хангажээ.
Унгарын парламент мөн өдрийн үдээс хойш Будапешт хотноо болсон бүгд хурлаар Шведийн НАТО-д гишүүнээр элсэх талаарх хуулийн төслийг албан ёсоор соёрхон баталсан болохыг France Press зэрэг гадаадын хэвлэл мэдээллийн агентлагууд мэдээлэв.
Хоёр жилийн өмнө ОХУ Украинд халдан түрэмгийлсний дараахан Швед улс НАТО-д элсэх хүсэлт гаргаж байсан билээ. Тэгвэл уг үйл явдлаас хойш нэг жил есөн сарын дараа ийнхүү эцэслэн шийдэгдэхээр болж буй нь энэ юм.
Унгарын парламентаас соёрхон баталсан албан ёсны бичгийг АНУ-ын Төрийн департаментад хүргүүлсний дараа Швед улс НАТО-гийн 32 дахь гишүүн болох эрх бүрдэх аж.
Эвсэлд үл нэгдэн төвийг сахих бодлогыг 200 гаруй жил баримталж ирсэн Швед улс Украинд дайн дэгдсэний дараа 2022 онд уг бодлогоосоо татгалзсан билээ. Улмаар Финланд улсын хамтаар НАТО-д элсэх хүсэлтээ өргөн барьсан бөгөөд Финланд өнгөрсөн оны дөрөвдүгээр сард НАТО-гийн 31 дэх гишүүн орон болсон юм.
Эх сурвалж: MBC