Спорт хувцас, хэрэглэлийн герман брэнд Adidas өнгөрөгч 2022 оны аравдугаар сард реппер Ye буюу Кание Уэсттэй хамтран ажиллахаа больсон билээ. Улмаар шийдвэрийн хүрээнд тэд өндөр борлуулалттай Yeezy пүүзнүүдээ ч худалдаанд гаргахаа зогсоосон.

Гэсэн хэдий ч өнгөрөгч оны сүүлээр тэдний мэдэгдсэнээр тэд Yeezy загварын пүүзнүүдийн үлдэгдлийг худалдаанд гаргана хэмээсэн юм. Тийнхүү саяхан Adidas компанийн албан ёсны хуудас дээр Yeezy Boost 350 V2 загварын пүүзийг худалдаа эхлэх гэж буй тухай мэдээлэл ч гарсан.

Тэгвэл эл явдлын хүрээнд реппер Кание Уэст өөрийн Инстаграм хуудаснаа нэгэн мэдэгдлийг(постыг одоо устгасан) нийтэлжээ.

Түүний бичсэнээр, “Ye-г хайрладаг хэн ч энэ хулхи Yeezy пүүзнүүдийг худалдан авахгүй. Миний зүгээс өнгөний хоршлыг ингэж загварчлаагүй. Эдгээрийн борлуулалтаас ч хувь хүртэхгүй бөгөөд Adidas миний эсрэг гомдол гаргасан. Энэ олон алдартан хийгээд олон нийт миний өмсөх нэг цамц эсхүл малгайны өнгөний эсрэг босдог ч хүүхдүүдийг маань надаас нуухад эсхүл Fortune 500 жагсаалтад багтдаг компаниудын нэг бодит амьдрал дээрх та нарын баатруудын нэгийг хүчирхийлэхэд хэн ч юу ч хийдэггүй. Юу ч хэлдэггүй. Энэ тогтолцоо байгаа цагт, одоо та нар юу хийх юм? Дахиад л миний цомгийг татан буулгаж, дансыг минь царцааж, хүмүүсийг надтай хамтран ажиллах гэвэл сүрдүүлэх үү? Энэ бүх 350 шинэ загварууд бүгд улиг болсон бас хүн бүр л 350 улиг болсныг мэдэж байгаа” гэсэн байна.

Гэсэн хэдий ч түүний зүгээс эл мэдэгдлээ устгасан билээ.

Эх сурвалж: Page Six