Хиймэл оюун ухаан технологид зориулсан хагас дамжуулагч үйлдвэрлэлээрээ дэлхийд тэргүүлэгч Америкийн NVIDIA компани орон нутгийн цагаар 18-ны өдөр хиймэл оюун ухааны шинэ үеийн чипээ танилцууллаа.

NVIDIA компани мөн өдөр Калифорниа мужийн Сан Хосе хотын SAP төвд “GTC (GPU Technology Conference) 2024” бага хурлыг зохион байгуулах үеэрээ хиймэл оюун ухааны шинэ үеийн чип “B200”-г дэлхий нийтэд танилцуулсан байна.

Энэхүү чип нь NVIDIA-ийн хамгийн сүүлийн үеийн хиймэл оюун ухааны чип гэж тооцогддог “H100” (Hopper)-ийн гүйцэтгэлээс хоёр дахин давсан үзүүлэлттэй хиймэл оюун ухааны технологид зориулсан шинэ үеийн чип аж.

Компанийн зүгээс энэхүү шинэ чипээ алдарт математикч, статистикч Дэвид Блэквэллийн нэрээр “Blackwell” гэж нэрлэсэн бөгөөд “H100”-тай харьцуулахад гүйцэтгэлийг 30 дахин сайжруулснаас гадна зардал болон эрчим хүчний хэрэглээний хувьд ч сайжруулж чадсан гэж тайлбарлав.

Тус компанийн гүйцэтгэх захирал Женсен Хуан “Hopper чип үнэхээр гайхалтай байсан хэдий ч бид илүү хүчирхэг чипийг хөгжүүлэхийг хүссэн. “Blackwell” бол аж үйлдвэрийн шинэ хувьсгалыг хурдасгах хөдөлгүүр юм” хэмээн онцлон тэмдэглэжээ.

Эх сурвалж: SBS Biz