ХАМАС бүлэглэлийнхний барьцаанд байгаа хүмүүсийг сулласны хариуд гал зогсоох хэлэлцээрийг байгуулахад ойртож байна гэж АНУ-ын Төрийн нарийн бичгийн дарга Энтони Блинкен лхагва гарагт мэдэгджээ.

Тэрбээр Саудын Арабын Жидда хотноо “Аль-Хадат” сувагт ярилцлага өгөх үеэрээ “Санал зөрөлдөөн багасаж байна гэж би хувьдаа бодож байгаа бөгөөд тохиролцоонд хүрэх боломжтой хэмээн харж байна” гэжээ.

“Бид оновчтой хувилбар саналыг дэвшүүлэхийн тулд Катар, Египет, Израилын талуудтай шаргуу ажилласан. Харин ХАМАС үүнийг хүлээж аваагүй. Тэд өөр хүсэлт, өөр шаардлага тавиад буцаж ирсэн. Хэлэлцээнд оролцогч талууд яг одоо үүн дээр ажиллаж байна” гэж Э.Блинкен хэлжээ.

“ХАМАС уг саналыг зөвшөөрөх эсэхийг бид харзнах ёстой болж байна. Хэрэв зөвшөөрвөл Газын зурваст байгаа хүмүүсийн зовлон зүдгүүрийг арилгах хамгийн шуурхай арга зам нь энэ байх болно. Бид бүхэн үүнийг л хүсэж байна” гэж тэрбээр ярилаа.

Арабын орнуудын удирдагчидтай уулзахаар өнөөдөр Египетэд очих гэж буй Э.Блинкен хэлэхдээ "дайн дууссаны дараа Газыг засан тохинуулахад юу ч тохиолдсон гэсэн бэлэн байх нь чухал" гэдгийг онцлон тэмдэглэжээ.

Эх сурвалж: CNN /МОНЦАМЭ агентлаг/