Даваа гарагт Ассошиэйтед Пресс агентлагаас мэдээлснээр сүүлийн үед Умард Солонгос, Оросын хил дээр галт тэрэгний хөдөлгөөн эрчимтэй нэмэгджээ.
Үүнийг тэд хиймэл дагуулын тусламжтайгаар тогтоосон бөгөөд АНУ-ын Вашингтон хот дахь Стратеги, олон улсын судалгааны төвөөс мэдэгдэж байгаагаар эл хөдөлгөөнөөс таамаглал дэвшүүлбэл, Умард Солонгос улс ОХУ-д зэвсэг нийлүүлж байж болох юм гэсэн байна.
Ийн таамаглах болсон шалтгаан нь өнгөрөгч сард Умард Солонгосын удирдагч Ким Жон Ун ОХУ-д айлчилж, ерөнхийлөгч Владимир Путинтай уулзан ОХУ-ын цэргийн гол баазуудаар зочилсонтой холбоотой юм. Улмаар албаныхны сэжиглэж байгаагаар Ким Жон Ун ОХУ-д тусалсныхаа хариуд Оросын зэвсгийн боловсронгуй технологийг мэдэх гэнэ.
Албаныхны хэлж байгаагаар Умард Солонгос-Оросын хил дээр байрлах Туманган төмөр замын өртөөгөөр өнгөрөгч таван жилийн хугацаанд хамгийн ихдээ 20 чингэлэг л зорчсон бол аравдугаар сарын тавны өдөр л гэхэд эл өртөөгөөр нийт 73 чингэлэг зорчсон гэжээ.
Эх сурвалж: AP News