Эквадорын шоронд гэмт хэргийн бүлэглэлийн гишүүдийн хооронд болсон цуст мөргөлдөөний улмаас 35 хүн амиа алдаж, 48 хүн шархаджээ.
Орон нутгийн цагаар 28-ны өглөө Эквадорын баруун хэсэгт орших Гуаякил хотын шоронд буу, тэсрэх бодис, хүйтэн зэвсэг бүхий үймээн дэгдэснийг хууль сахиулагчид таван цагийн дотор хяналтандаа авч чадсан хэмээн албаны хүмүүс мэдээлэв.
Амь үрэгдсэн хүмүүсийн тавынх нь толгой тасарсан байдалтай байсан бол үлдсэн нь буу болон тэсрэх бөмбөгт өртөн амь насаа алджээ. Тус мөргөлдөөн нь хар тамхины бүлэглэлүүдийн хооронд үүссэн маргаанаас болсон хэмээн таамаглаж буй аж.
Тус улсад өнгөрсөн хоёрдугаар сард дөрвөн шоронд нэгэн зэрэг бослого гарч 79 хүн амиа алдаж байсан бол долдугаар сард мөн хоёр шоронд гарсан үймээн 27 хүний аминд хүрсэн юм. Долдугаар сарын үймээний дараа Ерөнхийлөгч Гильермо Лассо засан хүмүүжүүлэх байранд дэг журам тогтоохын тулд онц байдал зарлаж байв.
Эх сурвалж: YTN