ЧатЖиПиТи (ChatGPT) технологийг хөгжүүлэгч ОпенЭйАй (OpenAI) компанийн гүйцэтгэх захирал Сэм Алтман Индонезийн засгийн газраас гадаадын хөрөнгө оруулагчдад олгодог "Алтан виз"-ний анхны эзэн болжээ.

Индонезийн Цагаачлалын асуудал эрхэлсэн комиссар Силми Карим орон нутгийн цагаар 5-ны өдөр Алтманд "Алтан виз"-ийг олгохоор болсноо зарлаад, "Хөрөнгө оруулалтад суурилсан болон өөр хэд хэдэн төрлийн “алтан виз” байдгийн нэг нь олон улсад нэр хүндтэй, Индонезид ашиг тусаа өгөх боломжтой хүмүүст олгодог “Алтан виз” юм” хэмээн онцлон тэмдэглэв.

"Алтан виз" нь гадаадын хөрөнгө оруулалтыг татах зорилгоор тус улсын хууль тогтоогчдын зүгээс өнгөрсөн долоо хоногт нэвтрүүлсэн төслийн нэг бөгөөд Алтман уг төслийг хэрэгжүүлж эхэлснээс хойш ердөө нэг долоо хоногийн дотор авч буй анхны эзэн нь болж байгаагаараа ихээхэн онцлогтой юм.

Энэхүү виз нь Индонезид их хэмжээний хөрөнгө оруулалт хийсэн гадаадын иргэдэд тус улсад 5-10 жил оршин суух эрхийг олгох аж. Тодруулбал тус улсын компани, аж ахуй нэгж эсвэл засгийн газрын бондод 350,000 ам.долларын хөрөнгө оруулалт хийсэн хүнд таван жил оршин суух эрхийг олгодог байна.

Нэмж дурдахад, уг визийг эзэмшигчид Индонезийн бүх нисэх онгоцны буудлуудад хамгийн түрүүнд бичиг баримтаа шалгуулан шалганаар нэвтрэх эрхтэй болох зэрэг давуу талыг эдлэх аж.

Комиссар Карим “Энэхүү алтан визийг эзэмшсэнээр Алтман манай улсад хиймэл оюун ухааны салбарт их зүйлийг хийж бүтээж, хөгжүүлнэ гэдэгт найдаж байна” хэмээн онцлов.

Эргэн сануулахад Алтман өнгөрөгч тав, зургадугаар сард Сөүл, Вашингтон, Токио, Парис зэрэг дэлхийн 17 томоохон хотуудаар айлчилж, бодлого боловсруулагчидтай нь хиймэл оюун ухааны талаар ярилцсан билээ. Тэгвэл энэ үеэр Жакарта хотноо мөн айлчилж байсан юм.

Гэвч энэхүү “алтан виз”-ийг авахаар тэрээр өөрөө мэдүүлсэн эсэх, эсвэл Индонезид хөрөнгө оруулах төлөвлөгөөтэй байгаа эсэх нь одоогоор тодорхойгүй байгаа аж.

Эх сурвалж: Yonhap