Фэйсбүүкэр толгойлуулсан сошиал платформ болох Инстаграм өсвөр насны хүүхдүүдийг хоол хүнстэй эрүүл бус харилцаатай болоход нөлөөлдөг ажээ.
Тодруулбал, Фэйсбүүкээс хийсэн судалгаанаас үзэхэд угаас хоол хүнстэй зохистой харилцаагүй охид Инстаграм хуудаснаа хайлт хийхэд, платформын алгоритм автоматаар охидод тухайн хайлтын утгатай төсөөтэй утга бүхий илэрцүүдийг үзүүлдэг байна.
Тийнхүү #skinny, #thin буюу туранхай, нарийхан гэх зэрэг утга бүхий хаштагаар хайлт хийсэн охидод _skinandbones_, applecoreanorexic, skinny._.binge буюу “яс, арьс”, “алимны гол шиг туранхай”, “хэт туранхай” гэх мэт хэрэглэгчийн нэр бүхий хаягуудыг дагахыг санал болгодог ажээ.
Улмаар тэдгээр хаягууд нь хэвийн хэмжээнээс туранхай, нэг төрлийн эцэнхий байхыг охидод уриалж, тийм л галбиртай байвал сайхан гэсэн ойлголтыг сурталчилдаг юм.
Цаашлаад тухайн суртал ухуулгад автсан өсвөр насны охид тэдгээр зураг шиг болох гэж хоолноос гарах, өөрсдийгөө албаар өлсгөх зэргээр зовоож, энэ нь хэтдээ хоол хүнстэй эрүүл бус харилцаатай болоход нөлөөлдөг гэнэ.
Харин энэ тухай мэдээлэл Фэйсбүүк компанид байдаг ч тэдний зүгээс өсвөр насны хүүхдүүдийн эрүүл мэндийг хамгаалах ямар ч дорвитой алхам хийдэггүй байна.
Эх сурвалж: NY Post