CNN агентлагийн орон нутгийн цагаар 13-ны мэдээлснээр, Юта мужийн Фармингтон хотын нэгэн сургуульд сурч байсан аутизмын хам шинжтэй Изабелла Тичнор ангийнхандаа дээрэлхүүлж, багш нартаа гадуурхагдаж явсаар өнгөрөгч 6-ны өдөр амиа хорлосон байна.
Тичнорын гэр бүлийн өмгөөлөгчийн ярьснаар түүний гэрийнхэн энэ тухай сургуулийн захиргаанд удаа дараа хэлж байсан боловч ямар ч арга хэмжээ авахгүй байсаар хөөрхий охиныг ийм алхам хийхэд хүргэжээ.
Өнгөрөгч 9-р сараас хойш ангийнхан нь түүнийг муухай үнэртэй хэмээн шоолж, арьс өнгөөр ялгаварлан гадуурхсан үгээр байнга доромжилж байжээ. Гэвч энэ бүхнийг болиулах үүрэгтэй ангийн багш нь охиныг хамгийн хойно суулгах зэргээр мөн гадуурхдаг байсан байна. Охиныг сургууль руугаа хувцасны үнэр дарагч авч явахыг харсан гэр бүлийнхэн нь хачирхалтай санагдан учрыг асуухад "Ангийн хүүхдүүд намайг муухай үнэртэй гэж шоолдог" гэж хариулж байжээ. Ар гэрийнхэн нь ангийн багшид нь гомдол гарган энэ асуудлыг шийдвэрлэж өгөхийг хүссэн хэдий ч ямар нэгэн дэвшил гараагүй аж.
Тичнорын үхэл олон нийтийн чихэнд хүрж эхэлмэгц Америкт газар сайгүй түүнийг дурсахын зэрэгцээ арьс өнгөөр ялгаварлан гадуурхах үзлийг халахыг уриалж байна. 9-ний өдөр түүний сурч байсан сургуульд 150 орчим хүн цугларч, охины дурсгалыг хүндэтгэх арга хэмжээг зохион байгуулсан бол 11-ний өдөр Үндэсний сагсан бөмбөгийн холбооны (NBA) Юта Жазз багийн зүгээс Тичнорын үхэлд эмгэнэл илэрхийлэх арга хэмжээг мөн зохион байгуулсан юм.
Эх сурвалж: Segye Ilbu
Америкийн үнэн нүүр царай