Ройтерс агентлагаас мэдээлж байгаагаар, Туркийн ерөнхийлөгч Эрдоган ханшийн уналтыг өмгөөлсөн агуулга бүхий мэдэгдэл хийсний дараагаар лирийн ханш 15 хувийн уналт үзүүлж, мягмар гарагт түүхэн дэх хамгийн доод үнэд хүрчээ.
Улмаар ханшийн уналтын хүрээнд Apple компанийн зүгээс тус улсад бараа бүтээгдэхүүн цахимаар худалдаалахаа түр хугацаанд зогсоосон байна. Тийнхүү хэрэглэгчид Apple Store руу нэвтрэхэд хэвийн ажиллаж байх мэт боловч ямар нэг худалдан авалт хийж, захиалга өгөх боломжгүй болсон гэнэ.
Apple компанийн зүгээс бүтээгдэхүүн худалдаагаа хэдий хугацаагаар зогсоож байгаагаа албан ёсоор мэдээлээгүй ч мэргэжилтнүүдийн үзэж байгаагаар Apple store-ийн үйл ажиллагааг бүрмөсөн зогсоочихгүй байх гэж таамаглаж байгаа юм.
Лирийн ханш нь өнгөрсөн долоо хоногоос хойш тасралтгүй унасаар одоогийн байдлаар нэг лир ердөө 0.078 ам.доллартой тэнцэж байгаа ажээ.
Эх сурвалж: The Apple Post