ОХУ 27-ны өдрөөс эхлэн Польш руу хий нийлүүлэхээ зогсоож байгаа аж.

Польшийн байгалийн хийн PGNiG компанийн зүгээс Польшийн нийслэл Варшав хотноо ОХУ төрийн өмчит байгалийн хийн компани Газпром компани энэ тухай 26-ны өдөр мэдэгдсэн талаар dpa агентлаг мэдээлэв.

Мөн Польшийн томоохон мэдээллийн портал сайтуудын нэг Onet.pl ч засгийн газар болон газрын тос, байгалийн хийн салбараас иш татан мэдээлснээр, 27-ны өдрөөс эхлэн ОХУ “Ямал-Европ” хийн хоолойгоор Польшид хий нийлүүлэхээ зогсоох болсон талаар онцлон хүргэж байсан юм.

Европын холбооны Хийн сүлжээний нийгэмлэгийн мэдээлснээр, орон нутгийн цагаар өнөөдөр үдээс хойш “Ямал-Европ” хийн хоолойгоор Беларусаас Польш руу хий нийлүүлээгүй, харин оройн цагаар дахин нийлүүлсэн байна. “Ямал-Европ” дамжуулах хоолой нь Оросын хийг Европ руу нийлүүлдэг гурван том хоолойн нэг юм.

ОХУ-ын талаас Польшийн талд учрыг нь тайлбарлаагүй ч өнгөрөгч 22-ны өдөр Оросын санал болгосон хийн төлбөрийг рублиэр төлөх бэлтгэл ажлын хугацаа дууссантай холбоотой гэж хэвлэлүүд мэдээлж байна.

Газпром компанийн зүгээс мөн Болгарын талд 27-ны өдрөөс эхлэн байгалийн хийн нийлүүлэлтээ зогсоохоо мэдэгдсэнийг тус улсын Эдийн засаг, санхүүгийн яамнаас иш татан Франс Пресс агентлаг мэдээлэв.

“Болгарын төрийн өмчит байгалийн хийн Булгаргаз компанид ОХУ-ын Газпром компани байгалийн хийн нийлүүлэлтээ 27-ны өдрөөс эхлэн зогсоох болсон талаараа мэдэгдэл хүргүүлсэн” хэмээн Эдийн засаг, санхүүгийн яам 26-ны өдөр цохон тэмдэглэсэн байна.

Эх сурвалж: SBS