Даваа гарагт ХБНГУ-ын засгийн газрын хэвлэлийн төлөөлөгч Штеффен Хебештрайтын мэдэгдсэнээр тус улсад эрчим хүчний хямрал нүүрлэж, байгалийн хийн хомсдол үүсэж байгаа ч засгийн газрынх нь зүгээс “Норд Стрим 2” шугамыг ашиглалтад оруулахгүй гэжээ.
Түүний хэлснээр, “Германы засгийн газар хийн шугамыг ашиглалтад оруулах боломжит хувилбаруудын жагсалтаасаа хассан. ОХУ ХБНГУ-д нийлүүлэх байгалийн хийн хэмжээгээ танаснаар бид бүгдэд сорилт болж байгаа бөгөөд үүнээс үүдэн ирэх хэд сар хүндхэн байх нь тодорхой.
Засгийн газрын зүгээс илүү хүндхэн нөхцөл байдал үүсэхээс сэргийлж тодорхой хэдэн арга хэмжээг авсан. Бидний хувьд Украин улсыг тууштайгаар дэмжиж байгаа. Тиймээс ч Европын Холбоо болон бусад олон улсын байгууллагаас баталсан хоригийг дэмжих болно.
Үйл явдлын хүрээнд “Норд Стрим 2” шугамыг ашиглалтад оруулах зөвшөөрлийг ойрын хугацаанд олгохгүй гэдэг нь ч тодорхой хэрэг. Улмаар бид байгалийн хийн хямралаас гарах арга замыг эрэлхийлэхдээ тус шугамыг ашиглалтад оруулах боломжит хувилбарыг авч үзэх ч үгүй” гэсэн байна.
Эх сурвалж: ТАСС