АНУ-ын эрчим хүчний яамнаас мэдэгдсэнээр тус улсын газрын тосны нөөц долоо хоногийн дотор 5.5 сая баррелиар нэмэгдэж, наймдугаар сарын 5-ны өдрийн байдлаар АНУ-ын газрын тосны нөөц 432 сая баррельд хүрчээ.
Эрчим хүчний яамнаас хэлж байгаагаар энэ нь өнгөрөгч 5 жилийн мөн үетэй харьцуулахад даруй 5 хувиар бага үзүүлэлт гэнэ.
Гэсэн хэдий ч газрын тосны нөөц нэмэгдсэнээр АНУ-д шатахууны үнэ буурсан бөгөөд бензин шатахууны үнэ л гэхэд 7.7 хувиар буурчээ. Улмаар тус улсын Хөдөлмөрийн яамнаас мэдэгдэж байгаагаар газрын тосны нөөц нэмэгдэж, үнэ буурснаар долоодугаар сард тус улсын инфляц 8.5 хувьд хүрч буурсан гэсэн юм.
АНУ-ын хувьд зургаадугаар сард инфляцын түвшин 9.1 хувьд хүрч, шатахуун түгээх станцуудад нэг галлон бензин 5 ам.доллароор худалдаалагдаж байжээ. Тийнхүү АНУ-ын долоодугаар сарын эдийн засгийн тайлан шинжээчдийн тооцож байснаас хавьгүй дээр үзүүлэлттэй гарсан байна.
Эх сурвалж: ТАСС, BBC