Дэлхийд хөрөнгийнхөө хэмжээгээр гуравдугаарт бичигдэж буй тэрбумтан Жефф Безос өнгөрөгч амралтын өдрүүдэд нэгэн жиргээ нийтэлжээ.

Тодруулбал, өдгөө 58 настай эрхэм өөрийн Твиттер хуудаснаа МакДоналдс сүлжээ ресторанд бургер, шарсан төмс идэж буй зургаа оруулж, “Миний анхны ажил. Гэхдээ амт нь одоо ч гайхалтай хэвээр. Ням гарагийн мэнд!” хэмээн бичсэн байна.

Нийт 155.3 тэрбум ам.долларын хөрөнгөтэй ноён Безосын хувьд ахлах сургуулийн сурагч байхдаа тус сүлжээ рестораны нэгэн салбарт ажиллаж байсан юм.

Энэ тухайгаа тэрээр 2018 онд өгч байсан нэгэн ярилцлагадаа дурссан бөгөөд ярилцлагад өгүүлснээр, “МакДоналдс надад үйлчилгээний салбарын ажил үнэхээр хэцүү гэдгийг ойлгуулсан. Би тогоочоор ажилладаг байсан. Тэд намайг үйлчлүүлэгчтэй харьцах ажилд томилдоггүй байсан. Учир нь тухайн үед би нүүрээрээ батгатай өсвөр насны хүүхэд байсан юм. Харин тэд намайг олны нүднээс хол ажиллуулахыг хүссэн хэрэг.

МакДоналдс сүлжээнд ажилласнаар би өндгийг нэг гараараа хагалж сурсан. Би бямба гарагийн өглөөний ээлжид ажиллах маш дуртай байсан. Ажилдаа ирээд би хамгийн түрүүнд нэг том саванд 300 өндөг хагалж хийдэг байсан юм” гэжээ.

Эх сурвалж: NY Post